Plantun de Prouvènço

Pèr coumpara dos planto d'encò nostre

Panicum capillare & Leptodon smithii

Panicum capillare

Poaceae Graminaceae

Noms en français : Panic capillaire, Millet capillaire.

Descripcioun :
Planto eisado de recounèisse emé si gràndi paumo primo e si fueio proun peludo. Trachis dins li champ e en ribo d'aigo. Aquesto planto nous vèn d'Americo de l'uba. Coumpara emé lou mi-de-risiero que ié sèmblo.

Usanço :
Lou mi-prim èro acampa pèr lis Indian d'Americo. N'en fasien de farino pièi la mesclavon emé la de gros-blad. Li fueio soun estado presso pèr raca.

Port : Erbo
Taio : 20 à 80 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Panicum
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 15 à 20 cm
Flourido : Estiéu - Autouno

Sòu : Ca
Autour basso e auto : 0 à 800 m
Aparado : Noun
Avoust à óutobre

Liò : Ermas - Ribiero - Champ
Estànci : Mesoumediterran à Coulinen
Couroulougi : Óurigino Americo-Nord
Ref. sc. : Panicum capillare L., 1753

Crosso-de-Smith

Leptodon smithii

Neckeraceae

Nom en français : Leptodon de Smith.

Descripcioun :
Aquelo mousso pluroucarpo trachis majamen sus li pège d'éuse e de roure. Douno de mato plato pu o mens grando, li tijo soun un à dous cop penado. Bagnado fai de tijo plato alor que seco douno de crosso que sèmblon pièi de cascavèu. La fueio èi redouno-óublougo emé de bord lisc. La costo fai aperaqui li tres part dous de la longour de la fueio.

Usanço :
I'a pas trop pèr s'engana emé la crosso-de-Smith que se recounèis pulèu bèn. Es uno meno proun coumuno au nostre e dins lou relarg mediterran. Au contre devèn raro à l'uba, pèr acò èi marcado sus listo roujo categourìo LC valènt à dire soucit minour.